Tibb müəssisələrində “Hemofiliya xəstəliyinə multidisiplinar yanaşma” mövzusunda seminarlar keçirilib
TƏBİB və Hemofiliyalı Xəstələrin Respublika Assosiasiyasının birgə təşkilatçılığı ilə tabeli tibb müəssisələrində çalışan həkimlər üçün “Hemofiliya xəstəliyinə multidisiplinar yanaşma” mövzusunda seminarlar keçirilib.
Cari ilin sentyabr ayından etibarən Sumqayıt, Quba, Qusar, Xaçmaz, Xızı, Şabran və Siyəzən şəhər və rayonlarını əhatə edən 7 regionda ardıcıl olaraq seminarlar təşkil olunub.
Təlimlərin məqsədi hemofiliyalı xəstələrin kompleks və sistemli idarə olunmasında iştirak edən hematoloq, pediatr, ortoped, fizioterapevt, psixoloq, laboratoriya mütəxəssisi və digər sahə üzrə ixtisaslaşmış əməkdaşların bilik və bacarıqlarının artırılması, müasir praktiki yanaşmalar üzrə məlumatlılığın genişləndirilməsi, həmçinin təcrübə mübadiləsinin gücləndirilməsi olub.
Eyni zamanda seminarlar tibb işçilərinin davamlı tibbi təhsili çərçivəsində onların elmi və peşəkar inkişafına töhfə verməyi hədəfləyib.
Qeyd edək ki, təlimlərə 07.09.2025-ci il tarixində başlanılıb və 7 sessiyadan ibarət proqramın sonuncu seminarı 28.11.2025-ci il tarixində baş tutub.
TƏBİB-in tabeliyində olan bütün aidiyyəti tibb müəssisələrinin əməkdaşları təlimlərə cəlb edilib və ümumilikdə 7 sessiya üzrə 323 əməkdaş iştirak edib.
