Ayaz Hüseynov: "Regionlara həyatı vacib dərmanlar hələdə çatdırılmır"
Bu gün Dünya Sağlamlıq Günü qeyd olunur. Bu mühüm gündə, Hemofiliyalı Xəstələrin Respublika Assosiasiyasının idarə heyətinin sədri Ayaz Hüseynov QHT.az-a açıqlamasında hemofiliya və digər qanın laxtalanma pozğunluqları ilə olan xəstəliklərlə mübarizənin əhəmiyyətinə diqqət çəkdi.
Ayaz Hüseynov qeyd edib ki, Hemofiliya xəstəliyinin müalicəsində istifadə edilən əvəzsiz laxtalandırıcı faktor preparatlarının ötən illərə baxdıqda təminatı artırılıb, buna səbəb məhz cənab Prezident İlham Əliyevin həssas qruplara dəstəyidir:
"Qeyd etmək istəyirəm ki, son 3 ildə müşahidəmiz onu göstərir ki, hemofiliyaya dair dövlət proqramının büdcəsi getdikcə artır. Bu da öz növbəsində həyati vacib dərman preparatlarının qıtlığını aradan qaldırır. Bir neçə il öncəyə nəzər salsaq, hər ilin sonu hemofiliyalı pasiyentlər ciddi dərman çatışmazlığı ilə üz-üzə qalırdılar, bu da öz növbəsində onların sağlamlığına ciddi mənfi təsir göstərərək əlilliyə sürükləyirdi. Son illər dərman preparatlarının artırılması ciddi şəkildə pasiyentlərin həyat keyfiyyətini yaxşılaşdırdı. Amma çox vacib və təxirəsalınmaz görüləcək işlər də var. Bunlardan biri hemofiliyalı pasiyentlərin aylıq profilaktik dərman dozasının regionlara çatdırılmasıdır. Əfsuslar olsun ki, regionlarda yaşayan hemofiliyalı vətəndaşlar, onlara təyin edilən dərman preparatları üçün məcbur olub Bakı şəhərinə üz tuturlar. Ayda bir və ya bir neçə dəfə Bakı şəhərinə gəlmək onların sağlamlığına və sosial durumlarına ciddi mənfi təsir göstərir. Həyati vacib dərman preparatlarının regionlara çatdırılması, bütün dünyada olduğu kimi, bizim ölkəmizdə də həyata keçirilməsi çox vacibdir. Əks halda pasiyent yaxşı halda əlilliklə üz-üzə qalacaq, pis halda isə qanaxmadan dünyasını dəyişə bilər. İkinci problem isə hemofiliyadan başqa digər qanın laxtalanması ilə bağlı olan xəstəliklərdir. Bu xəstəliklərdən Bernar Soulye və Qlansman xəstəlikləri diqqətə alınmalıdır".
Ayaz Hüseynov həmçinin qeyd edib ki, qeyd olunan xəstəliklərin müalicəsində vacib olan 7-ci faktor preparatlarıdır, amma əfsuslar olsun ki, bu xəstəliklərdən əziyyət çəkən vətəndaşların 7-ci faktor preparatına əlçatanlığı yoxdur, çünki 7-ci faktor preparatları dövlət proqramı çərçivəsində yalnız hemofiliyalı pasiyentlərə nəzərdə tutulub: "Digər qanın laxtalanma pozğunluqlarından əziyyət çəkən pasiyentlərin müalicəsi mümkün olmur. Mütləq şəkildə digər qanın laxtalanma pozğunluğundan əziyyət çəkən vətəndaşların müalicəyə əlçatanlığını bərpa etmək lazımdır".
Pərvanə Fərhadqızı
QHT.az