Dəyərli Hemofiliyalı dostlar və onların ailə üzvləri. Hemofiliyalı Xəstələrin Respublika Assosiasiyasının rəhbərliyi olaraq hər zaman yanınızdayıq. Ürəyinizi sıxmayın. Yaranan müvəqqəti problemlər  Azərbaycan dövləti tərəfindən tezliklə həll olunacaq. Bütün çətinlikləri birlikdə qət edəcəyik.

Bu müraciətlə Hemofiliyalı Xəstələrin Respublika Assosiasiyasının sədr müavini Ayaz Hüseynov çıxış edib.
Sədr müavini qeyd edib ki, 2006-cı ildən Azərbaycan hökuməti  hemofiliyalı xəstələrdə  qanaxmaların və əlilliyin qarşısının  alınması  üçün Hemofiliya xəstəliyi üzrə Dövlət Proqramı çərçivəsində keyfiyyətli dərman preparatları ilə təmin edir. Hər 5 ildən bir təkmilləşən Dövlət Proqramı hemofiliyalı xəstələrin sağlam və keyfiyyətli həyatını təmin etmək üçün 2016-2020 ci illər üçün Proqramda birincili profilaktika  (uşaq yaşlarından) profilaktika və ikincili (hemofiliyanın ağır formasından əziyyət çəkən xəstələr üçün) profilaktika nəzərdə tutulmuşdur. Birincili və ikincili profilaktik müalicə üçün qanın laxtalandırıcı Faktor konsentratları dərman preparatlarının  olması böyük əhəmiyyət kəsb edir. Hal hazırda Hemofiliyalı Xəstələrin Respublika Assosiasiyasının ofisinə hemofiliyalı vətəndaşların çox saylı müraciətlərinə əsasən  dərman preparatlarının kəskin çatışmazlığından əziyyət çəkdikləri bildirilir.
Qeyd edək  ki, Azərbaycanda 1500-dən çox hemofiliya və digər qanın laxtalanma pozuntularından əziyyət çəkən vətəndaş qeydiyyatdadır. Onlardan Hemofiliya  A formasından 1163, Hemofiliya B formasından 141, digər laxtalanma pozuntuları ilə  olan xəstələrin sayı 325 nəfər təşkil edir. Bunlardan 50-55 % məktəbə qədər, məktəb yaşlı  uşaqlar və gənclərdir.